මාත් ආසයි සිංහලෙන් ලියන්න................

   හුඟක් දවස් ඉඳන් තිබුණු අදහසක් තමයි සිංහලෙන් බ්ලොග් එකක්  ලිවීම.ඒත් ඉතින් අනං මනං වැඩ අස්සේ,මේ අදහස හැමදාමත් යටපත් වෙනවා.කල් යල් බල බලා ඉඳල නං පටන් ගන්න වෙන්නෙ නැහැ මේක කවදාවත්,ඒක නිසා මෙන්න මම හදිසියෙම පටං ගත්තා සිංහලෙන් බ්ලොග් එකක් ලියන්න.

     ඇත්තටම මම හුඟක් කල් ඉඳන් බ්ලොග් කියෙව්වා,කමෙන්ට්ස් දැම්මා ; බ්ලොග් මැරතන් දුවද්දී බලන් හිටියා,වතුර ගැහුවා; ඒත් මම නිර්නාමිකව හිටපු නිසා කවුරුවත් මාව අඳුනන්නේ නැහැ.ඔන්න ඒ නිසා මම හිතුවා මගේම අදහස් එකතු කරලා,මගේම කියලා සිංහල බ්ලොග් එකක් ලියන්න. 

    ඇත්තටම සිංහලෙන් බ්ලොග් එකක් ලියන්න මාව පෙලඹුණේ සිංහලෙන් දැනට තියෙන බ්ලොග් ප්‍රමාණය සහ ඒවායේ තියෙන ගුණාත්මක වටිනාකම දැකලයි.අනිත් කාරණය , අපි කොච්චර ඉංග්‍රීසි පාවිච්චි කලත් , අපේ භාෂාවෙන් ලියවුනු දෙයක් කියවනකොට දැනෙන තරම්,ඇඟටවත් හිතටවත් ඒක නොදැනෙන එක ස්වභාවිකයි.මොකද අපි ඉපදුනු දවසේ ඉඳන් ඇහුවෙ,කිව්වෙ,ලිව්වෙ අපේම මව් භාෂාවෙන් මිසක් පර භාෂා වලින් නෙවෙයිනේ.

     ඒක නිසා,සමහරු කොහොම කිව්වත්,අපිට වටින්නේ අපෙ මව් භාෂාවයි. ඉතින් මව් භාෂාවෙන් සයිබර් අවකාශය තුල කියවන්නන්ට,මේ සිංහල බ්ලොග්ස් වලින් ලැබෙන දැනුම අප්‍රමාණයි.ඔන්න ඒ අප්‍රමාණ දැනුම් සාගරේට මගෙනුත් පුංචි දායකත්වයක් අද ඉඳන්.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

හමුවෙමු නැවතත්!!!! ඔබට ජය!!!!